ពី VAYOFM ថ្ងៃទី ១៩ ខែ កុម្ភៈ ឆ្នាំ ២០១៤ ៖ដោយ ឃួន សុភ័ក្រ ៖
តំណាងរាស្ដ្រគណបក្សសង្គ្រោះជាតិ គ្រោងនឹងចុះជួបអ្នកជាប់ឃុំ២១នាក់ជាថ្មីទៀត ក្នុងពេលឆាប់ៗខាងមុខនេះ បន្ទាប់ពីខកខានមិនជួបកាលពីលើកមុន ដោយសារតែគ្មានការអនុញ្ញត្ដពីមន្ដ្រីពន្ធនាគារ ត្រពាំងថ្លុង ក្នុងខេត្តកំពង់ចាម។
អ្នកនាំពាក្យរងគណបក្សសង្គ្រោះជាតិលោក យ៉ែម បុញ្ញាឬទ្ធិ បានថ្លែងប្រាប់វិទ្យុខ្មែរអន្ដរជាតិវាយោFM នៅថ្ងៃទី១៩ ខែកុម្ភះនេះ ថា គណបក្សសង្គ្រោះជាតិ គ្រោងដាក់លិខិតជាថ្មី ទៅកាន់តុលាការ ដើម្បីស្នើសុំចុះសួរសុខទុក្ខអ្នកជាប់ឃុំ២១នាក់ ដែលកំពុងជាប់ឃុំនោះ ហើយការដាក់លិខិតនេះ អាចធ្វើឡើង នៅក្នុងសប្ហាហ៍ក្រោយនេះ។
អ្នកនាំពាក្យដដែល បានសម្ដែងក្ដីសង្ឃឹម ថា ការដាក់លិខិតលើកនេះ នឹងអាចមានការអនុញ្ញាត្ដ ពីតុលាការ ក៏ដូចជាមន្ដ្រីពន្ធនាគារត្រពាំងថ្លុង ដើម្បីឲ្យតំណាងរាស្ដ្រគណបក្សសង្គ្រោះជាតិ អាចចុះសួរសុខទុក្ខ អ្នកជាប់ឃុំទាំង២១នាក់នោះ។
តំណាងរាស្ដ្រគណបក្សសង្គ្រោះជាតិ លោក សុន ឆ័យ កាលពីថ្ងៃម្សិលមិញ បានថ្លែង ថា ប្រសិនបើមានការដោះលែងអ្នកជាប់ឃុំទាំង២១នោះ ការចរចារកដំណោះ ស្រាយដែលនៅសេសសល់ សម្រាប់ផលប្រយោជន៍ជាតិ រវាងគណបក្សទាំងពីរ នឹងកាន់តែមានបរិយាកាសល្អប្រសើរ។
ជាការឆ្លើយតប មន្ដ្រីជាន់ខ្ពស់គណបក្សប្រជាជនកម្ពុជា ព្រុំ សុខា បានគូសបញ្ជាក់ ថា ការដោះលែង ឬមិនដោះលែងអ្នកជាប់ឃុំទាំង២១នាក់នោះ ជាសមត្ថកិច្ចរបស់តុលាការក្នុងការសម្រេច មិនអាចធ្វើអ្វីរំលងច្បាប់បានឡើយ។
សូមបញ្ជាក់ ថា កាលពីថ្ងៃទី០២ និងទី០៣ ខែមករា ឆ្នាំ២០១៤ សមត្ថកិច្ចបានចាប់ខ្លួនមនុស្សចំនួន២៣នាក់ នៅក្នុងការប៉ះទង្គិចគ្នា ដោយហិង្សា នៅមុខរោងចក្រយ៉ាកជីង និងនៅផ្លូវវេងស្រេង ហើយភ្លាមៗ តុលាការក៏បានចោទប្រកាន់អ្នកទាំងនោះ នឹងបានបញ្ជូនទៅកាន់ពន្ធនាគារ ត្រពាំងថ្លុង ក្នុងខេត្តកំពង់ចាម។
យ៉ាងណាក៏ដោយ កាលពីពេលថ្មីៗនេះ តុលាការបានសម្រេចដោះលែង អ្នកជាប់ឃុំចំនួន២នាក់ ក្នុងចំណោម២៣នាក់នោះ ឲ្យនៅក្រៅឃុំបណ្ដោះអាសន្នសិន៕
ដោះលែងអ្នកទាំង ២៣ 